بيت حمايا حكايات اماني السيد

فتحت الباب بضربة رجلي رنت في أرجاء الصالة، والصوت خلى الراجل ينط من مكانه مفزوع، وأخت جوزي اتلخبطت للحظة قبل ما ترجع تفرد ضهرها بتبجح. وقفت في نص الصالة، عيني بتقد شرار، وبصيت للصنايعي بصوت زلزل الحيطان: “اتفضل اخرج برا يا أسطى! الشقة دي ليها صاحبة، ومفيش مسمار هيدق فيها ولا حيطة هتتهد من غير إذني.. اتفضل من غير شوشرة!”

الراجل بص لأخت جوزي بارتباك، ولم أدواته وانسحب وهو بيقول: “يا فتاح يا عليم.. ربنا يصلح الحال”، وخرج وقفل الباب وراه.

أول ما الباب اتقفل، أخت جوزي حطت إيدها في وسطها، وعينيها احمرت من الغيظ، وقربت مني بخطوات سريعة وصوتها جهوري:

“إيه الأسلوب ده؟ إزاي تطردي راجل جايباه بيتي؟ أنتِ اتجننتي يا سحر؟ جاية تستعرضي عضلاتك عليا في بيت أبويا؟”

صرخت فيها وأنا مش شايفة قدامي، وقربت منها لدرجة إن نفسي بقى في وشها:

“بيت أبوكي مين يا أختي؟! الشقة دي شقتي أنا! بفلوسي وشقايا ودهب سنيني اللي لميتوه من ورايا! سنة سايباكي تاكلي وتشربي وتقعدي فيها بحجة يومين، ودلوقتي جايبة صنايعية تكسري وتهدي في ملكي وعايزة تعملي أوضة نوم كمان؟ أنتِ صدقتي الكذبة ولا إيه؟ أنتِ بايعة وقابضة تمنها عدا ونقدا وماصبرتيش على جنيه !”

ضحكت بسخرية، وقالت بصوت مليان غل:

“شقة مين يا روحي؟ العقد اللي في إيدك ده تنقعيه وتشربي ميته! الشقة لسه باسمي في الشهر العقاري وباسم أبويا في كل ورق الحكومة، يعني قانوناً وشرعاً وعُرفاً دي شقتي! والفلوس اللي بتتكلمي عنها دي كانت تعويض عن سنين خدمتي لأبويا.. فوقي يا شاطرة، محدش يقدر يطلعني من هنا ولا يمنعني أعمل في الشقتي اللي أنا عايزاه!”

الكلمات نزلت عليا، الغدر كان واضح وصريح من غير أي كسرة نفس. دمي غلي لدرجة إني مكنتش حاسة بإيديا وهي بتترعش من القهر والغضب:

“بقى كدة؟ بتعترفي عيني عينك إنك ناوية تاخذي حق مش حقك؟ العقد اللي بتقولي عليه ينقع وأشرب ميته ده، بيه في المحاكم والأقسام.. وقسمًا بربي، لا أنتِ ولا مية زيك هيقعدوا في شقا ابني دقيقة واحدة بعد النهاردة!”

صوتنا كان عالي لدرجة إن العمارة كلها اتهزت، وفي ثواني سمعت صوت جري على السلم، وباب الشقة اتفتح ودخلت حماتي وهي بتصوت وتلطم على خدودها:

“يالهوي يا فضيحتنا قدام الجيران! إيه اللي بيحصل هنا؟ عايزة تطردي بنتي من بيتها يا سحر؟”