بعد مارجع من الغربه حكايات محمد عبده

لا هو اللي قال لي إنها موافقة وإن الموضوع سر بيننا عشان ما تقلقش وإنت بره

إسلام حس إن فيه حاجة مش راكبة في الكلام وسألها

طب وإنتي ليه صدقتيه من غير ما تسألي ندى

أمه ردت بصوت واطي

عشان كان معاه ورقة عليها توقيع شبه توقيعها

إسلام قام من مكانه وقال بعصبية

ورقة إيه وتوقيع إيه هو إنتي كنتي بتدفعي فلوسي لأي حد يجيب لك ورقة

أمه مدت له الورقة وقالت

أنا عارفة إني غلطت بس الراجل كان بيأكد لي إن ندى عارفة وإنها مش عايزاك تعرف عشان ما تزعلش منك

إسلام مسك الورقة وفضل يبص فيها ولما ركز في التوقيع حس إن فيه حاجة غريبة فعلًا لكن قبل ما يتكلم موبايله رن

كانت سارة أخت ندى

رد بسرعة وسمع صوتها وهي بتقول

إسلام إنت لازم ترجع حالًا ندى تعبت فجأة ومش قادرة تقف على رجليها

إسلام حس إن قلبه وقع منه وساب كل حاجة وجري على العربية

طول الطريق كان بيدعي إنها تكون بخير ولما وصل الشقة لقى سارة واقفة عند الباب وندى قاعدة على الكنبة ووشها شاحب وبتحاول تاخد نفسها بهدوء

جري عليها وقال

ندى مالك حاسة بإيه

قالت له بصوت ضعيف

دوخة وتعب شديد من الصبح بس ما كنتش عايزة أقلقك

سارة بصت له بعتاب وقالت

هي من ساعة ما مشيت وهي متوترة وخايفة تكون فيه مشكلة جديدة مع والدتك

إسلام مسك إيد ندى وقال

مفيش أي مشكلة تستاهل إنك تهملي صحتك عشانها إحنا هنروح للدكتور دلوقتي

أخدها للمستشفى وبعد الكشف والتحاليل الدكتور طلب إنها ترتاح وتلتزم بالعلاج والأكل المناسب لحالتها وحذرهم من تأجيل المتابعة الطبية

فضل إسلام جنبها لحد ما اطمأن عليها ولما رجعوا الشقة قعد جنبها وقال

أنا عايز أسألك سؤال ومش عايزك تخافي من الإجابة

ندى بصت له وقالت

اسأل يا إسلام

طلع الورقة اللي أخدها من أمه وحطها قدامها وقال

إنتي عمرك طلبتي من أمي تساعد خالك بفلوس أو مضيتي على الورقة دي

ندى أول ما شافت الورقة اتغير لون وشها ومسكتها بإيد بتترعش

وقالت بسرعة

أنا عمري ما مضيت الورقة دي ولا طلبت من حد ياخد فلوسك عشان خالي

إسلام قرب منها وقال

بصي كويس يا ندى التوقيع شبه توقيعك فعلًا