حكايات السيد
ج 1 حكايات مني السيد حصري
مراتي رمت شبشبها على أمي بعد ما أمي وجهت لها كلامًا قاسيًا عن أصلها، وأنا اتعصبت على مراتي ووقفت جنب أمي، واعتذرتلها ووعدتها إن مراتي هتيجي تعتذر لها. أمي قالتلي إنها سامحتها، واخواتي كلهم وقفوا قصادي وقالولي يا تطلّق مراتك يا تعتبر نفسك خسرتنا طول العمر!
أنا يوسف، عندي ٣٥ سنة، ومتجوز سلمى بقالي خمس سنين. سلمى ست طيبة، وبتحبني، وعمري ما حسيت إنها مقصرة معايا، لكن مشكلتها إنها عصبية، ولو حد جرحها بكلمة بترد عليه من غير ما تفكر في العواقب.
من أول جوازنا، كان فيه خلافات بينها وبين أمي، وكنت دايمًا بحاول أكون حلقة الوصل بينهم. أوقات كنت بحس إن أمي بتشد عليها في الكلام، لكن كنت بقول لنفسي إن دي أمي، وإن سلمى المفروض تستحمل شوية عشان خاطر العشرة.
وسلمى كانت بتسكت كتير عشاني، لحد ما حصلت الخناقة الأخيرة. كنت راجع من الشغل، وأول ما فتحت باب الشقة، سمعت صوت أمي وهي بتزعق. دخلت الصالة، لقيت سلمى واقفة قدامها ودموعها في عينيها، وأمي بتقول لها بغضب:
إنتي ناسية نفسك ولا إيه؟! إنتي جاية من الشارع، ولولا ابني كان زمانك قاعدة في بيت أبوكي!
سلمى بصتلها بصدمة، وكأنها مش مصدقة إن الكلام ده اتقال لها. حاولت ترد، لكن أمي فضلت توجه لها كلامًا قاسيًا، وفجأة سلمى فقدت أعصابها وخلعت شبشبها ورمته ناحية أمي.
أنا اتجننت من المنظر، وجريت على أمي أطمن عليها، وبعدها لفيت لسلمى وزعقت فيها:
إنتي اتجننتي؟! إزاي تعملي كده في أمي؟! مهما حصل، دي أمي!
سلمى بصتلي ودموعها بتنزل وقالت:
وإنت سمعت هي قالتلي إيه؟! سمعت الكلام القاسي وساكت، ولا مستني مني أفرش لها الأرض وأرد بعد ما كسرتني بكلامها؟!
رديت عليها بعصبية:
كان ممكن تردي بالكلام، إنما تمدي إيدك عليها؟! إنتي كده غلطانة!
سلمى سكتت، وبصتلي بنظرة عمري ما هنساها، وبعدها دخلت أوضتنا وقفلت الباب.
فضلت جنب أمي أحاول أهديها وأراضيها، ووعدتها إن سلمى هتيجي تعتذر لها.
أمي هديت وقالتلي:
خلاص يا ابني، مفيش حاجة، وعشان خاطرك أنا مسامحاها.
وقتها ارتحت، وقلت لنفسي إن الموضوع انتهى، وإن بكلمتين حلوين هقدر أصلح اللي حصل. لكن تاني يوم، إخواتي عرفوا بالخناقة، والدنيا اتقلبت.
أخويا الكبير كلمني وقال:
إنت لسه سايب مراتك في بيتك بعد اللي عملته ده؟! لو فضلت على ذمتك، متعتبرنيش أخوك تاني!
